for bavarian Native Speakers

[Frank78]

Wal se ja sinst koana draud, muaß hoid i wieda amoi mocha (an alle Modis, bitte nicht löschen, nur weil ihrs nicht lesen könnt )

Oiso, Buam und Maadln, des is da Dräd fia olle, de no boarisch kinnan und si ned schamman, dasses zuagem. Mia hamma oissn - Übasetzungs-Särwiss, Ernährungsdipps uuund Kine-Ludwig-Lobbreisungen. Wer bei ins nix findt, is koa Baya!

Und iatz riats eich, wurscht ob Bayer, oder Sechzga, ob evagolisch oda echta Pfarra, de junga und de oidn, de blädn und de deppatn, de Ehrlichn und de Baubeamtn... (schee zamgstoin vu da Biamäslblosn und vum Ambros Woifgang)

 

[Dmx82]

.. wurscht ob Bayer, oder Sechzga, ob evagolisch oda echta Pfarra, de junga und de oidn, de blädn und de deppatn, de Ehrlichn und de Baubeamtn...

Auweh, ohne unsan Frank wa des Forum nur hoib so erheiternd... :wink:
A won i ka bayer bin, i gfrei mi das i den fred ohne ibasetzhungshülfe lesn ko, san oba eh a poa do, wos rihrts eich denn ned?

seas aus wien
Chris

 

[Buteo]

"poa"?
hört si nach Erkan und Stefan o ... de krassen Checker :wink:

Naa, des bairisch schreiben liegt mir ned so ... ich sprich liaba boarisch. Sehr zur Erheiterung meiner Kunden ...
Besonders Schleswig-Holstein und NRW lieben es :wink:

Meist kummt: "endlich einmal jemand der auch bayrisch spricht" :lol2:

 

[glasone]

Ja Frank des is amoi a guade idee mit dem neia Dräd. Nachad kimma a amoi über de Preissn schimpfa und de verstena uns goaned.
Ober auf d´letzt redn´s dann nimma mit uns. Des war ja a ned schee.
Oba drotzdem an scheena gruaß an olle die des lesn kinna.

Gerhard

 

[Bereal]

Jo Servus,

gell da bi I jetz frei au dabei. I hob mer dacht, dass vielleicht net I ois Njubi so an Dfred aufmacha soid, net dass mi die Modis aussam Forum haun. Ibr dia Preissn konn I eigentlä net schimpfa (bishär) :wink: .

Griaß eich olle mitanand, aof gehts Buam, hia redn mia!

Ond mia san mia!

Schod, dass`s hia kan schuaplattlnden-lederhosn-gamsboart-seplhuat-Smaili gibt! Des dat no passa!

 

[Mxxxer]

... A won i ka bayer bin, i gfrei mi das i den fred ohne ibasetzhungshülfe lesn ko, ...

Dere Chris! Wenn des so is, dann kännst ja am Richard übersetz´n, hehe. :twisted:

Leidl´n, des is supa, a Dreed af Boarisch, klasse. Wem is´n des wieder moi eigfoin? ......... Ah, ja eh kloar, wem denn sinscht, hihi. :wink:

Gruaß an Frank

Markus

 

[La Suisse]

Jo liabe Leidln,

de Idä ist wirkli pfundig mit dem Fodn.

In da Arwat redma ja olli blos no preissisch mit englische Einsprengsl. Und wenn i mei bests Hochdeitsch rauskram, wann a moi a Gschäftspartna aus Hamburg oder Frankfurt do ist, oder wenn i mit a Kundschaft hoch im Nordn telefoniern dua, dann hoasts owei glei "Ja schön, sie sprechen ein so nettes Bayerisch". Dös find i dann aber a glei wieda nett.

Servus nacha,
da Manni

(der übahaupt nix gega Preissn, Schwobn, Saxn und andere Landsleit hot - Übersetzungsmodus ein: "der rein gar keine Ressentiments gegenübern Norddeutschen, Lechschwaben, Württembergern, Badensern, Sachsen und anderen deutschen Volksgruppen hegt" - Übersetzungsmodus aus)

 

[Frank78]

da Manni??? oiso wannst Du da Manfred bischt, dann daade o song Du bischt da Mane, und ned da Manni...

 

[La Suisse]

mei, füa de Leid aus Minga bin i da Manni und je weida i aufs Land kimm, desto mehr hoassnsmi Mane - und im Gschäft bin i nach wieda da Manfred (zwecks de ganzn Preissn do).

Aba Du ois Weidla derfscht ruhig Mane sogn! I glab, Du host as in Düsseldorf a net imma leicht mit dene Rheinlända, dene preissischn - oda ?

 

[Frank78]

aaach, des geht, wal i bi oo obassungsfähi (beim Schattnroasn - Shadowrun - hoast se des "Soziales Chamäleon"):
Soi hoassn, dasse mei Sprach mid a boa NRW-Ausdrück würz, bsundas nochm drittn Woaz; Andraseitz hanne in meine Spuirundn dene aa scho a boar boarische Sprich beibrocht, de at gern hergnumma wern, wia zum Beispui:
"Nehmts eam s´Bia weg!!!"
oder in Anlehnung an Michi Mittermeier (dene sehr schätz, wiar at an Astor Willy):
"Do gemma, der bastld wos!"
und imma wieda gern gnumma, walma at olle Fuim-Fäns han, in Anlehnung an d´Mumie:
"I bins da Depp!" - statt Imhotep

Is hoid a gem und a nemma!

ah so, no wos, ia woaß ned, obe a Waidla sa mecht, wal bei uns im untan boarischn Woid is sowos ehmda a Schimpfwoat, woaßt? d´Weidla, han sechane wie de aus da Freyn oda sowos, de beyn (bellen) hoid - FREIBIER!!! - Wou, wou, wou?

 

[Kaliber 66]

Dös is amoal a Pfunds Gschreib. Doa drunten hoab i gscheite zwelf Joar zubracht. (bei de Schanzer)
Alsdann pfiats eich
Viele Griäss von'd Insl

 

[Frank78]

wos schleicht so spad durch Nacht und Wind, s´is da Grenni mid seim Spind -
um Gods Wuin do hint is no glei schlimma, do kimmd da Pio mid seim Zimma!

Dangschee Oida, vu wos fia ana Insl ren ma nochad, England oda Schottland???

 

[La Suisse]

na, dann host Du di ja guat eiglebt do obn und dene a bissl wos von unsare Sittn und Braich zoagt. So keat si dös. "Oachkatzlschwoaf" host as ja wahrscheinli a scho sogn lassn - oda ?

Da untre Boarische Woid ist na so da südliche Teil, der zu de Niedabayern ghert? Und do wo boid werd, dös is dann d'Obapfoiz - kriag e dös richti zsamm? I mecht ja koin auf d'Fiass steign - ned das ma mi no oana an krumma Hund hoasst.

Mit'm Mittameier kon i seit a boa johr nimma so vui ofanga, der is ma jetzt irgendwie z'kindisch woarn. Aber an Astor Willi, den find i scho pfundig. Musikalisch find i a den Buchner, den jeder blos ois Haindling kennt, sauguat. Der macht a supa Musi, i hobn scho a bo moi life - oiso in echt hoit - spuin segn. A bo Blattn - de hoast ma ja seit a boa joahr "CD" - hob i a von eahm.

Do in Haindling drent - bei Straubing do, dös is no net im Woid, aba ma siegtn scho ganz guat von do aus - hot der a a schens Haus (s'war amoi s'Wirtshaus)

 

[Kaliber 66]

Doa wo i etza bin, is d Siedküst. Net amoal schlecht. Bloss dass'd Oachkatzln grau san is a bissl bschissn.

 

[Frank78]

Da Schorsch, ja, koa schlechte Musi, vor allem de Schlogzeigsoli aafn Biadragl ham wos. Haindling liegt owa nadda an Dinglfing wia an Schdraubing, wanna me ned deisch!

An Willy hanne aa schon a boarmoi leif gehng und gheart und hanna amoi in Deitz (Bad Tölz) droffa. Ganz a sümbatischa und übahaupt ne obghom und zu dere Zeid wara aafm Höhepunkt.

Oachkatzlschwoaf war ma z´Billig, walsd damid oo an jedn Breiss drogriagst. I han in ana friaran Rundn (mid freindlicha Undaschdützung vu oam vu do heromand, dea oft gnua drunt Urlaub gmocht hod) dene eigschmatzt, daß Woipadinga wirkli exischdiern - und letschtns honne ma aus Zwiesl a Achtung Wolpertinger-Schuidl bsorgt - hängt iatz an meina Dia!

da "Untare" is so Deggndoaf bis Reng, Zwiesl eine. Liegst scho richdi, Mane

 

[Bereal]

Geh, a jetz rots amoi vo wem des is:

"Wenn Sie vom Hauptbahnhof in München mit zehn Minuten ohne daß Sie am Flughafen noch einchecken müssen dann starten Sie im Grunde genommen am Flughafen am ... am Hauptbahnhof in München starten Sie ihren Flug zehn Minuten - schauen Sie sich mal die großen Flughäfen an wenn Sie in Heathrow in London oder sonstwo meine s Charles de Gaulle in äh Frankreich oder in äh in ... in Rom wenn Sie sich mal die Entfernungen ansehen, wenn Sie Frankfurt sich ansehen dann werden Sie feststellen daß zehn Minuten Sie jederzeit locker in Frankfurt brauchen um ihr Gate zu finden - Wenn Sie vom Flug - äh vom Hauptbahnhof starten Sie steigen in den Hauptbahnhof ein Sie fahren mit dem Transrapid in zehn Minuten an den Flughafen in an den Flughafen Franz-Josef Strauß dann starten Sie praktisch hier am Hauptbahnhof in München - das bedeutet natürlich daß der Hauptbahnhof im Grunde genommen näher an Bayern an die bayerischen Städte heranwächst weil das ja klar ist weil aus dem Hauptbahnhof viele Linien aus Bayern zusammenlaufen."

Des ko ma bei dene sogar als Embedrui ohearn, zom aabrecha guat!
http://www.die-stimme-der-freien-welt.de/post/20060113/stoiber-transrapid

 

[Frank78]

ja mei, i woas a ned, wos de Baulie damois unsam guadn Edi in Kaffä do hod, dassa sowos gsogt hod...

 

[La Suisse]

Ja unsa Ede, wos machan de ganzn Kaberetistn jetza one eahm ?. Da Beckstein ist do doch blos a schwacha Ersatz...

Haindling ghert ja zu Geislhöring - a kloans Stadtl in dem glabi nix los is - nach Schtdraubing is a bisl nacher ois nach Dinglfing - aba dös is ja a wurscht.

Kennts a übrigens vom Haindling den "Hoidzscheitl-Rap". Do hot a an Spruch drin, der irgenwo an da Woifahrts-Kircha vom Bognberg drosteh muas.

"Da Oasidl vo Bogn hod Hoidzscheidl g'globn
und hod si an Schiefling in'n Arsch einizogn
Da Mesna vo Krailing, a kreizbraver Mo,
dea hod eam den Schiefling vom Arsch ausado"

So, servus nacha - bi fertig fia heid!

Manni (Mane

 

[Frank78]

do muase a d´Biermöslblosn denga, de ham a so a scheens Schdiggl, de Sankt Öd Nightmare, do hoasts unta andam:

"...da Deife hockt im Raufang drin,
dea hod ganz gwieß nix gscheids im Sinn -
und aufm Schroud in seina Noud,
do frisst da Doud a Breckl Broud!"

oda at:

"im hintan Kammal is ei Geischt,
der olle dumma Leid voschbeist!"

Vu dene hane fascht olle Liada!

 

[Bereal]

Ha, de Biermösls! Dia sig i am Freitag laif, mitsamt am Gerhard Poid.
I schaug amoi ob i do a Buidl mochn ko.